Yn 1998 fierde de provinsje 'Fryslân 500'. Mei betinkingen en eveneminten waard stilstien by it feit dat Fryslân 500 jier lyn troch Albrecht van Saksen yn 1498 ûnder sintraal gesach kaam. Dêrmei kaam in ein oan de ferneamde Fryske frijheid. It feest hat fan begjin ôf oan foar- en tsjinstanners hân. Yn it politike praatprogramma Op it Aljemint praat Onno Falkena op 23 april 1997, dus in jier foardat Fryslân 500 is, mei Pieter de Groot, sjoernalist by de Leeuwarder Courant en kritikaster en Thom van der Goot, direkteur fan De Lawei en as bestjoerder belutsen by Fryslân 500.