Wolkom op weromrop.frl, de argyfwebside fan Omrop Fryslân. Besjoch hjir in seleksje út de earste tweintich jier Fryske telefyzje, fan 1985 oant en mei 2005.
Rige programma's dêr't Geart de Vries mei Fryske filmmakkers praat en hoe't sy Fryslân sjogge. Yn diel sân Klaas Rusticus. Hy makke teäter en muzyk foar jeugd en makke syn telefyzjedebút by Swiebertje yn 1969. Foar de NCRV makke er it jeugdprogramma Orimoa yn 1974. Ek regisearre er de film Boete dwaen nei in ferhaal fan Teatske Alzum (1978), dy Fryske film wie op lanlike telefyzje te sjen, in primeur. We sjogge ek in fragmint út de film 'Want alleen kan ik niet gaan' (1979) en in muzykregistraasje út 1990. Rusticus wurket no benammen yn Dútslân.
Dizze Sadwaande giet oer it Fries Paarden Centrum yn Drachten. Dat is krektlyn iepene, mei keninginne Beatrix. Der is in grutte evenemintehal, in maneezje en sels in hotel. We sjogge by de training, keuring en yn de stâlen en der is ek in tentoanstelling oer de skiednis, mei sjeas en Frysk kostúm. We sjogge ek by keunstner Hans Jouta. Floris is hynsteflústerer.
Douwe Heeringa is op Skylge, by it Oerolfestival. Hy sjocht allerhanne acts op strjitte. Ek komme foarstellingen op ferskate lokaasjes foarby fan: Les Arts Sauts, Dogtroep, Derevo, Suver Nuver, De Muzen, Wonderbaar, Stichting Papa en Rauw.
Klaas Jansma hat Aggie van der Meer fan Boalsert as gast. Neist har wurk as skriuwster is se aktyf yn de fredesbeweging en warber foar Leefbaar Fryslân.
Klaas Jansma yn petear mei foarsitter Joop Atsma fan de CDA-fraksje yn Provinsjale Steaten. Atsma is dan ek foarsitter by it hurdfytsbûn en sjoernalist by streekblêd De Feanster.
Bouke Oldenhof yn petear mei âld-direkteur Roel Oostra fan teater De Lawei yn Drachten. Oostra fertelt oer syn stap fan banketbakker nei teaterdirekteur en de groei fan de skouboarch yn Drachten.
It ferhaal oer frjemde ljochten yn de loft boppe De Gordyk yn 1974. In tal ynwenners dy't it sjoen hat, tinkt dat de ljochten fan UFO's ôfkomstich binne.
It ferhaal fan in groepke fan fjouwer jonge aventoeriers dy't yn 1979 mei harren selsboude flot, de Sterke Yerke, de oseaan oerstekke wolle nei Curaçao. Spitigernôch spat de dream nei 126 dagen op in klif foar Bonaire útinoar.
De Fryske Akademy bestie yn 2008 70 jier. Omrop Fryslân folge in pear ûndersikers: wurdboekman Piter Boersma, taalûndersiker Arjen Versloot en histoarikus Hans Mol. Ek direkteur Rein Salverda en rektor magnifikus Jacob Fokkema fan de TU Delft komme oan it wurd.
Hy kin sjoen wurde as ien fan de súksesfolste Fryske keunstners: Gerriet Postma fan Twizelerheide. Hy eksposearre yn München, Barcelona en New York. Omrop Fryslân wie begjin 2009 úteinsetten mei opnamen foar in portet fan de eigensinnige Fries, doe't er ein febrewaris dat jier ûnferwachts ferstoar yn syn wenplak Grins. Hy waard 76 jier. Oan de hân fan de lêste opnamen en argyfmateriaal is in byld makke fan it libben fan Gerriet Postma.
Yn it earste diel fan de rige oer it Frysk Festival fan 2008 giet it oer de gearwurking mei Flamingen, bygelyks yn de opera Platée en de teaterproduksje Twee Oude Vrouwtjes. Ek hearre we Francis van Broekhuizen sjongen yn de produksje fan Opera Spangea; Donna Giovanna.
Twadde diel fan in rige fan 3 dokumintêres oer it Frysk Festival fan 2008. Dit diel giet oer de byldetentoanstelling yn it park Vijversburg by Tytsjerk, mei ûnder mear de 4 meter hege drol fan Wim T. Schippers. 14 keunstners út binnen- en bûtenlân eksposearen yn de Bosk fan Ypeij. It tema is de tiid.
Hoite en Sytze Pruiksma wurde folge by de tariedings fan har foarstellings. Yn 'Rite fan Wetter' kombinearre Hoite Pruiksma dûns, muzyk en wetter yn in teaterspektakel dat brocht waard midden op 'e Hofmar, by It Heidenskip. Sytze Pruiksma liet yn syn foarstelling 'Lân' it Fryske lânskip as in partituer sjen op grutte filmdoeken, midden yn it Hegewiersterfjild, in natuergebiet tusken Kimswert en Harns.
De fjirde Wrâldspelen foar net-olympyske sporten wiene yn de stêd Busan yn Súd-Korea. Neist kompetysjesporten binne der ek demonstraasjesporten, dy't letter mooglik in fêst ûnderdiel fan de spelen wurde kinne. Yn 2008 wiene der fierljepdemonstraasjes, bedoeld om mear omtinken foar de sport te generearjen yn oare plakken op de wrâld. Omrop Fryslân folge de Nederlânske delegaasje fierljeppers op harren missy.