Weromrop.frl - útstjoerings

Bouwe Rein en Peter Dijkstra binne beide as dirigint aktyf yn de muzykwrâld. Heit Bouwe rjochte it ynternasjonaal ferneamde Roder Jongenskoor op, dêr't soan Peter ek by siet. Hy stie mei it koar yn it Concertgebouw foar de Matthëus. Ek rjochte er it Martini Jongenskoor yn Snits op. Soan Peter begûn as jonge sopraan, mar stie op syn 13de al te dirigearjen. Nei in stúdzje oan it konservatoarium is er suksesfol, û.o. mei it Nederlands Kamerkoor, en wurket er ek yn it bûtenlân. Muzyk spile thús in grutte rol. Beide fertelle oer har passy en ek wat de ferskillen tusken har binne.

We sjogge achter de skermen by de opnamen fan de film 'Sportman fan de Ieu' oer pealsitter Teake. De film spilet him ôf yn Fryslân yn de jierren tritich. We prate mei akteurs, lykas Jochum ten Haaf en Joke Tjalsma en sjogge by de opnamen. Der is ek in taalcoach dy't om de útspraak fan it Frysk tinkt.

Sâltfabryk Frisia yn Harns hellet sâlt út de grûn. Yn 1993 en yn 2002 binne der fergunningen ôfjûn om dat te dwaan. We sjogge by it fabryk, mar ek by tsjinstanners fan de winning: boeren dy't skea ûnderfine, lykas it sâlter wurden fan de grûn en boaiemdelgong. Ferskate partijen komme oan it wurd: TNO, LTO en Wetterskip Fryslân en we sjogge by tal fan (biologyske) boeren.

By It Friesland College (beropsûnderwiis) wurdt ynset op it nije learen: praktykstjoerd ûnderwiis. Gjin roasters, fakken en sifers, mar coaches, leartrajekten en prestaasjes. We sjogge by FC-XL foar learlingen dy't noch gjin beropskar makke ha en by saaklike tsjinstferliening. De skoalle leit út wêrom't se hjirfoar kieze, dosinten en learlingen komme oan it wurd en ek heechlearaar ûnderwiiskunde oan de RUG dy't kritysk op dit soarte fan ûnderwiis is. Learlingen leare sa gjin kennis en feardichheden. Ek net alle leararen kinne har yn dizze foarm fine.

Diskusjeprogramma oer dualisme yn it lokale bestjoer. It dualisme is fjouwer jier lyn ynfierd. It hâldt yn dat de wethâlder net langer lid fan de gemeenteried is en dat dy it belied útfiert dat troch de ried fêststeld is. Yn it stedhûs fan Dokkum wurdt ûnder lieding fan Gryt van Duinen praat oer wat it dualisme brocht hat, mei foar- en tsjinstanners. Oan tafel sitte heechlearaar Douwe Jan Elzinga en de politisy Jan Waterlander, Lute Pen, Karst Berkenbosch en Piet Waaijer.